Hvers eiga óbeinir reykingamenn að gjalda?

Frá upphafi hafa óbeinir reykingamenn geta notið þess að anda að sér reyk annarra í góðra vina hópi á krám og veitingarstöðum. Vegna laganna sem tóku gildi nú um mánaðarmótin heyrir það nú sögunni til.

"Það er búið að taka af okkur ánægjuna við að fara út að skemmta okkur", segir Salvör Guðbjartsdóttir, talsmaður nýstofnaðra samtaka óbeinna reykingamanna. "Sjálf er ég einstæð tveggja barna móðir og hef einfaldlega ekki ráð á því að greiða fyrir mínar reykingar. Óbeinar reykingar eru eini kosturinn í stöðunni fyrir mig og nú er búið að taka hann frá mér. Það virðist enginn bera hagsmuni okkar fyrir brjósti."

Salvör vonast til að nýskipaður heilbrigðismálaráðherra gangi í málið. "Það virðist hafa gleymst að hugsa um okkur. Fyrir hvern beinan reykingamann eru fimm óbeinir reykingamenn. Það eru ansi mörg atkvæði, gleymum því ekki!"

Og Salvör bætir við: "Ég lít á þetta sem aukna skattheimtu. Það er augljóst að þetta kemur verst við okkur, sem minnst höfum á milli handanna." En hverju munu samtökin beita sér fyrir? "Við teljum að ríkið eigi að niðurgreiða reykingar í stað þess að skattleggja þær, enda eru reykingar í eðli sínu velferðarmál. Reykingar kunna hugsanlega að stytta lífið en þær gera það bara svo miklu skemmtilegra! Það er engin spurning að við höfum orðið fyrir töluverðri skerðingu á lífskjörum."

Varúð: Lesist eingöngu til skemmtunar!

Mannvonska Clintons á sér engin takmörk!

Repúblikanar höfðu rétt fyrir sér, eftir allt saman. Clinton virðist hreinræktað illmenni! Sjáið bara myndbandið.

Sjónvarpsstöðin Fox þykir nokkuð höll undir íhaldssöm gildi í bandarískum stjórnmálum. Myndskeiðið sjálft er hinsvegar úr kvöldþætti Jay Leno á NBC.

Til hamingju Illugi!

Ég er einn þeirra sem ljáði Illuga Gunnarssyni stuðning minn í prófkjöri Sjálfstæðismanna. Illugi er maður að mínu skapi, fljótur að hugsa og rökviss en jafnframt með hjartað á réttum stað. Auðvitað þykir mér það miður að Illugi fái ekki enn betra tækifæri til að láta ljós sitt skína að þessu sinni en það er einfaldlega bara svo mikið af góðu fólki í flokknum. Illugi á að minnsta kosti framtíðina fyrir sér!

Illugi varaformaður þingflokks sjálfstæðismanna

Svona er kosið í einræðisríkjum

Það er nokkuð ljóst hvað ætlast var til að kosið væri, hér að neðan. Kosningarnar snerust um inngöngu Austurríkis í þýska ríkjasambandið og stuðning við flokk þjóðernisjafnaðarmanna, ári áður en seinni heimsstyrjöldin braust út.

Fyrir þá sem eru farnir að ryðga í menntaskólaþýskunni: "Ert þú samþykk/ur því að Austurríki hafi að nýju fengið inngöngu í þýska ríkjasambandið, sem tók gildi 13. mars 1938, og kýst þú flokk foringja okkar, Adolfs Hitler?". Stærri hringurinn er merktur já, sá minni nei.

Þetta er ekkert plat.

Nýjar ásakanir

Hillary (til vinstri) með frönskum klæðskiptingi.

Nú er að koma upp á yfirborðið að Hillary Rodham Clinton, væntanlegur forsetaframbjóðandi Demókrata í Bandaríkjunum, mun hafa sagt margsinnis ósatt á átta ára tímabili, eða nánar tiltekið á árunum 1951 til 1959, þegar Hillary var 4-12 ára gömul. Lygarnar munu spanna allt frá því að hafa sagst vera búin með matinn sinn til að vera búin að læra heima. Í ljósi mikilvægi þess að sá eða sú sem kemur til með að gegna valdamesta embætti jarðarinnar sé laus við allan breyskleika, þá hefur George W. Bush skipað nefnd, sem er ætlað það hlutverk að komast til botns í þessu máli. Meðal annars verður rætt við skólafélaga hennar úr leikskólanum, en leyniþjónustan hefur lýst yfir áhyggjum sínum af því að a.m.k. einn þeirra mun vera af sýrlenskum uppruna. Ekki er talið útilokað að hann hafi leikið sér í sama sandkassa.

Bill vildi skilnað frá Hillary árið 1989

Hverjir standa á bak við stjórnina?

Nú þegar útlit er fyrir að Sjálfstæðisflokkur og Samfylking myndi saman ríkisstjórn er ekki úr vegi að skoða aðeins hverjir standi á bak við hina væntanlegu stjórn.

• Rúmlega 115 þúsund kjósendur (52%) kusu annanhvorn flokkinn
• Tæplega 70 þúsund (31%) greiddu einhverjum hinna flokkanna atkvæði sitt
  
• Rúmlega 36 þúsund (16%) nýttu sér ekki kosningarétt sinn

Ef litið er til greiddra atkvæða fengu flokkarnir tveir 62%. Þau atkvæði tryggðu þeim 68% þingsæta. Það er því ljóst að ríkisstjórn þessara tveggja flokka hefur mjög sterkan þingmeirihluta. Vandi nýrrar stjórnar liggur hinsvegar í því að meirihluti kjósenda í tveim kjördæmum greiddi öðrum flokkum atkvæði sitt.

Stuðningur við Sjálfstæðisflokk og Samfylkingu, greindur eftir kjördæmum

Kjördæmi	D+S	Af greiddum atkvæðum	Af kjörskrá
Suðvestur	32.163	70%	59%
Reykjavík suður	24.074	67%	55%
Reykjavík norður	23.008	65%	53%
Suður	15.903	62%	52%
Norðvestur	8.992	49%	43%
Norðaustur	12.282	48%	41%
Alls	115.502	62%	52%

Það er ljóst að það verður ákveðin landfræðileg slagsíða á hinni nýju stjórn sem kemur óhjákvæmilega til með að setja þrýsting á málaflokka sem höfðu meira vægi í síðustu stjórn. Hvort að það sé jákvætt eða neikvætt er eflaust hægt að deila um, en það er ágætt að hafa þessar tölfræðilegu staðreyndir í huga næstu daga þegar við fylgjumst með stjórnarmynduninni.

Til varnar Framsóknarflokknum

Ímyndum okkur að Sjálfstæðisflokkurinn hefði náð 26 mönnum inn í stað 25. Léki þá nokkur vafi á því hvort að núverandi stjórn héldi áfram? Framsóknarflokkurinn hefur 7 þingmenn, sem eru litlu færri en Vinstrihreyfingin hefur, sjálfskipaður sigurvegari kosninganna. Kosningar eru tæki til að mynda starfhæfan meirihluta. Það, hvaða fylgi flokkar höfðu í öðrum kosningum, er aukaatriði. Vandi Framsóknarflokksins er ekki fylgið, heldur það hversu fáa raunhæfa kosti hann hefur til stjórnarmyndunar. Það yrði ekkert traust milli flokka í vinstristjórn. Jafnframt vantar núverandi stjórn einn mann upp á til að hún sé fýsilegur kostur. Sjálfur kysi ég helst stjórn Sjálfstæðisflokks og Samfylkingar, en það er annað mál. Framsóknarflokkurinn á fullt erindi í íslensk stjórnmál, enda standa á bak við hann tæp 12% kjósenda.

Pólitískar játningar

Komment á kjörstað í morgun

Mér þykir vænt um alla flokka. Ég lít svo á að þeir hafi allir eitthvað fram að færa. Enginn flokkur er nógu stór til að stjórna landinu einn og sér. Það neyðir flokkana til að eiga með sér samstarf. Þegar þangað er komið er gagnlegt að trúa því ekki að allt besta fólk landsins sé samankomið í einum flokki og að í hinum séu eintóm úrhrök.

Það er útlit fyrir tvísýnum kosningum. Með því er átt við að það er óljóst hvort að stjórnarmeirihlutinn haldi. Satt best að segja er mér alveg sama hvort hann geri það eða ekki. Ef hann heldur, þá vona ég bara að munurinn verði það lítill að menn treysti sér ekki til að halda áfram með óbreytta stjórn!

Það er eðli stjórnarsamstarfs að samkomulag myndast um að ákveðnir málaflokkar njóti friðhelgi. Í valdatíð núverandi stjórnar hafa hinar heilögu kýr verið landbúnaðarkerfið og Evrópumálin. Þar er kominn tími á breytingar. Til að keyra þær í gegn þarf hinsvegar sterka stjórn. Það er mitt persónulega mat að stjórn Sjálfstæðisflokks og Samfylkingar væru líklegust til þess að stýra þeim í höfn. Það leynist nefnilega kratahjarta undir heiðbláu yfirborðinu á Komment.

Sigurvegarar kosninganna

Það er algjör óþarfi að bíða fram á laugardag með að útnefna sigurvegara kosninganna. Líkt og endranær vinna allir.

Sjálfstæðisflokkurinn
Flokkurinn er að bæta við sig verulegu fylgi. Hann endurheimtir þau þingsæti sem töpuðust árið 2003 og gerir væntanlega gott betur.

Samfylkingin
Flokkurinn heldur stöðu sinni sem næst stærsti stjórnmálaflokkur landsins. Hann hefur náð að hrinda áhlaupi Vinstri grænna og er orðinn trúverðugur ríkisstjórnarflokkur.

Vinstrihreyfingin grænt framboð
Flokkurinn tvöfaldar fylgi sitt frá síðustu kosningum. Styrkur hans og stærð gerir það að verkum að ekki er hægt að komast hjá því að hlusta á hann.

Framsóknarflokkurinn
Flokkurinn vinnur varnarsigur. Niðurstaða kosninganna verður betri en kannanir gáfu til kynna og mun gefa flokknum sterkari grunn til að byggja sig upp frá.

Frjálslyndi flokkurinn
Flokkurinn ljáir umdeildum málum rödd sína. Þótt flest okkar geti ekki hugsað sér að kjósa hann vegna þeirra, þá endurspeglar fylgi hans raunverulegar áhyggjur kjósenda hans. Endurnýjun flokksins eftir brotthvarf Margrétar hefur tekist betur en stuðningsmenn hans þorðu að vona.

Íslandshreyfingin
Þótt flokkurinn nái ekki manni inn á þing þá hefur rödd hans fengið að heyrast. Hugmyndir flokksins eiga hljómgrunn meðal kjósenda þótt þeir séu fæstir tilbúnir að láta þær ráða atkvæði sínu.

Og þar hafið þið það.

Staða og horfur fram að kosningum

Sá ágæti maður, Ólafur Þ. Harðarson, sagði eitt sinn við mig á göngunum í Odda: "Þegar maður lærir stjórnmálafræði, fer manni smám saman að þykja vænt um alla flokka." Svei mér þá, ef það er ekki eitthvað að marka þetta.

• Framsóknarflokkurinn á hrós skilið enda hafa flokksmenn unnið hart að því að undanförnu að bæta ímynd flokksins. Mál Jónínu Bjartmarz hlýtur hinsvegar - og ætti - að kalla fram óbragð í munni kjósenda.
  
• Ég tek undir það sem Andrés Magnússon sagði fyrr í kvöld að ef kosningarnar koma til með að snúast um hæfni Geirs H. Haarde að leiða þjóðina, þá eru það góðar fréttir fyrir Sjálfstæðisflokkinn. Stjórnarandstaðan er ekki öfundsverð að þurfa að glíma við Geir og Þorgerði Katrínu.
• Frjálslyndi flokkurinn hagnast á því að kjósendur eru orðnir þreyttir á því að hlusta á gagnrýni á stefnu flokksins í málefnum nýbúa. Gagnrýnin kom í raun á besta tíma fyrir flokkinn. Hann á bara eftir að sækja í sig veðrið fram að kosningum. Gleymum því heldur ekki að í kjörklefanum þurfa menn ekki að svara fyrir fordóma sína, þetta er leynileg kosning.
• Ómar Ragnarsson er því miður á góðri leið með að eyðileggja Íslandshreyfinguna. Ómar kemur fram í fjölmiðlum sem hugsjónarmaður án jarðtengingar. Engum er illa við Ómar, en kjósendur virðast ekki ná að sjá hann fyrir sér sem stjórnmálaleiðtoga.
• Samfylkingin náði að tryggja sér meira fylgi en henni bar í raun með hræðsluáróðri við síðustu kosningar. Innanbúðarvandamál hafa síðan komið í veg fyrir að fastafylgi flokksins hafi fylgt því eftir. Ingibjörgu Sólrúnu verður ekki stætt á að sitja mikið lengur eftir þessar kosningar. Hennar tími er einfaldlega liðinn.
• Það hefur verið magnað að fylgjast með uppgangi Vinstri grænna. Flokkurinn hefur nú fengið til baka það fylgi sem Samfylkingin stal af honum við síðustu kosningar og meira til. Vandinn er að flokkurinn mælist stærri en innviðirnir þola. Róttækni og breiðfylking fer einfaldlega ekki saman.
• Baráttusamtökin hafa náð þeim árangri sem þau geta vonast eftir. Hinir flokkarnir hafa þegar ættleitt þann hluta málefnapakkans sem þeir treysta sér til að taka. Samtökin snúast nú aðeins um persónulegan metnað einstaklinga, sem enginn þekkir hvort sem er.

 

Fylgi Samfylkingar og VG jafnmikið