Seldi sófa, áskotnaðist kona

Á síðasta ári setti breskur maður inn auglýsingu á Craigslist, sem er vinsæll póstlisti, sérstaklega hjá fólki í upplýsingatæknigeiranum, vegna forláta sófa, sem hann vildi selja. Svo vildi til að kynni tókust með manninum og konunni sem keypti sófann. Í dag eru þau hjón, sitja saman í sófanum á kvöldin og horfa á CSI.

Ég vil nota tækifærið og benda á frábæra hliðstæða þjónustu hérlendis, sem kallast Partalistinn. Mér er ekki kunnugt um að hjónaband hafi orðið til upp úr viðskiptum í gegnum hann, en það er þó aldrei að vita. Ennfremur verður fróðlegt að fylgjast með því hvort að sófinn verður settur aftur í sölu á Craigslist ef hjónabandið fer út um þúfur.

Athugasemdir

[Lilja Haralds (IP-tala skráð) 8.5.2007 kl. 22:10]

Ohh, ég sem er búin að hanga á kassi.is í leit að sófakærasta/kærastasófa.

Gastu ekki ropað þessu út úr þér fyrr, Komment?! 

[Kallaðu mig Komment, 8.5.2007 kl. 22:48]

Nú skráirðu bara allt úr geymslunni í Partalistann og vonar það besta. :)

[Lilja Haralds (IP-tala skráð) 9.5.2007 kl. 00:25]

En hér er mitt vandamál:  Mér líkar vel við sófann og á engan aukalega í geymslunni.

Hins vegar get ég alveg látið gamlan sólstól sem ég á sem datt í sundur níutíu-og-eitthvað.  Heldurðu að eðalkarlmenn setji það fyrir sig?

Kæri Komment, ástarlíf mitt er í þínum höndum. 

[Kallaðu mig Komment, 9.5.2007 kl. 00:55]

Ef þú heldur rétt á spilunum þá þarftu ekki að láta sófann. Sófinn er bara agnið. Vandinn er hinsvegar sá að ef úr þessu yrði nú samband þá myndirðu alltaf spyrja þig, að hve miklu leyti er það sófinn og að hve miklu leyti þú, sem hann girnist? Svo væri maðurinn náttúrlega sófisti samkvæmt skilgreiningu.

[Lilja Haralds (IP-tala skráð) 9.5.2007 kl. 02:26]

Ég mun pipra, er það ekki? 

[Sigurgeir Orri Sigurgeirsson, 9.5.2007 kl. 10:20]

Ég auglýsti eftir straumbreyti á fartölvuna mína og fékk straumbreyti á fartölvuna mína. Spurning hvort ég auglýsi eftir dósaopnara, þá hlýtur eitthvað að gerast.