Hvílíkt lýðskrum

Ástæða þess að Sarkozy nýtur meira fylgis en Royal er einföld. Meirihluti Frakka lét ekki ginnast af innstæðulausum loforðum hinnar síðarnefndu. Nú á að reyna að brúa bilið með slagorðaflaum. Í stað þess að bjóða upp á raunhæfar lausnir á þeim vandamálum sem Frakkar glíma við fer hún þá ódýru leið að reyna að telja kjósendum trú um að þarna takist á gott og illt, beitir vopnum sem ég var að vona að hefðu verið grafin í lok kaldastríðsins.

Tengt þessu þá þykir mér alltaf jafn sárt þegar ég verð vitni að umburðarleysi þeirra sem gefa sig út fyrir að vera málsvarar réttlætis og manngildis gagnvart þeim sem leyfa sér að efast um þær leiðir sem þeir stinga upp á. Því miður á það við alltof marga í pólitíkinni, jafnt hér heima sem úti í hinum stóra heim. Ég beini þessu til allra sem telja sig betri en samferðarmenn sína, sama hvar í flokki þeir standa.

Royal hvetur andstæðinga peningahyggjunnar til að sameinast

Samanburður á stefnuskrám flokkanna

Helstu niðurstöður úr ítarlegum samanburði mínum á stefnuskrám flokkanna:

• Stefnuskrá Samfylkingarinnar bragðaðist best. Pappírinn leystist fljótt og vel upp og skráin rann ljúflega niður. Mér er hinsvegar hálfbumbult.
• Stefnuskrá Framsóknarflokksins var prentuð á dýrasta pappírinn.
• Íslandshreyfingin prentaði ein flokka á endurunninn pappír.
• Stefnuskrá Vinstri-grænna var erfið aflestrar. Rautt letur á grænum grunni er afleitt, sérstaklega fyrir lesblinda.
• Stefnuskrá Sjálfstæðisflokksins stóð sig best á skutluprófinu. Hún flaug lengst.
• Stefnuskrá Fjálslynda flokksins var ódýrust, enda prentuð í Póllandi.

Stefnuskrár flokkanna bornar saman

Rétt aðeins forsmekkurinn

Það er fyrirséð að þessi hugmynd verði að veruleika. Í fyrsta lagi er þetta tæknilega mögulegt. Í öðru lagi er eftirspurn eftir þessari þjónustu, sem gerir hana hagrænt fýsilega. Áhyggjufullir aðstandendur sjá til þess. Að lokum er andlega vanheilt fólk í engri aðstöðu til að mótmæla þessu.

Það kemur mér hinsvegar á óvart að enginn hafi enn séð sér hag í því að bjóða foreldrum sambærilega þjónustu. Ég þykist nokkuð viss um að það sé bara spurning um tíma hvenær börn verða merkt með þessum hætti. Hver vill ekki vita hvar barnið sitt er þegar níðingar leynast í hverju skoti?

Þegar sú kynslóð vex úr grasi þarf síðan ekki nema hryðjuverk á borð við 9/11 til að krafan komi loks fram að allir verði merktir - til að tryggja eigið öryggi og þjóðarinnar.

Förum vel með frelsið til að forða því að heimurinn verði svona.

Rafræn merking eldra fólks