Hvað ræður röð niðurstaðna hjá Google?

Hefurðu einhvern tíman velt því fyrir þér, hvað ræður röð niðurstaðna hjá Google? Svarið færðu hér: PigeonRank™



Skoðaðu líka: Leitaðu á Google með hugarorku!

Leitaðu á Google með hugarorku

Google hefur þróað sérstaka leitartækni, sem byggir á því að Google les hugsanir þínar, þannig að þú þarft ekki að hafa fyrir því að skrifa þær. Þú getur prófað tæknina hér, að neðan. Prófaðu oftar en einu sinni, það eru margar niðurstöður, hver annarri skemmtilegri!

Leiðbeiningar:

• Ef þú notar gleraugu, taktu þau þá af þér. Speglunin truflar niðurstöðuna.
• Starðu á MentalPlex hringinn, hér til hliðar. ALLS EKKI HREYFA HAUSINN.
• Sjáðu fyrir þér það sem þú ert að leita að.
• Þegar þú ert kominn með skýra mynd í hugann, smelltu þá á hringinn.

Spurt og svarað and myndskýringar .

Brjóstgóður bangsi

Með ákveðnum vilja má sjá nokkuð brjóstgóðan bangsa út úr myndinni. Er enn að jafna mig. Mér er spurn, veit frú Kolbeins af þessu? Líklega er þetta bein afleiðing af því að ég fór í Smáralindina í dag...

Goðsagnir um hjónaskilnaði

Eftirfarandi upplýsingar hef ég frá Bandaríkjunum. Sjálfur er ég mjög vel giftur!

1. Fólk lærir af mistökum. Því eru seinni hjónabönd líkleg til að ganga betur en þau fyrstu.
   Þótt auðvitað sé þetta til í dæminu þá segir tölfræðin okkur annað. Skilnaðartíðni fólks í seinna hjónabandi er hærri en í því fyrsta.
2. Með því að búa saman áður minnkarðu líkurnar á skilnaði síðar.
   Svo er ekki, að minnsta kosti ekki í Bandaríkjunum. Tímasprengjan virðist byrja að tifa um leið og fólk byrjar að búa saman þótt sambúð sé auðvitað góð leið til að kynnast hinum innri manni.
3. Skilnaður eru vissulega sársaukafullir fyrir börn, en þau eru fljót að jafna sig.
   Þvert á móti hafa rannsóknir sýnt að skilnaðir sitja í börnum og hafa mælanleg áhrif á hegðun þeirra á fullorðnisárum.
4. Að eignast barn bætir hjónabandið og minnkar þannig líkur á skilnaði.
   Tíminn eftir að fyrsta barnið fæðist reynir mjög á hjónabandið. Einnig er ekki sjálfgefið að fólk geti eignast barn saman. Það kallar oft á skilnað.
5. Skilnaður hefur neikvæð áhrif á lífsgæði kvenna en jákvæð á lífsgæði karla.
   Þetta er reyndar rétt, ef eingöngu er litið til efnahagslegra gæða. Tölurnar tala þar sínu máli. En á móti kemur að þegar fólk velur skilnað, þá er það vegna þess að það telur þann kost skárri.
6. Þegar foreldrar rífast mikið þá er skilnaður betri kostur, barnanna vegna.
   Þetta er hálfsannleikur og þar með jafnframt hálf lygi. Ósamkomulag foreldra hefur vissulega slæm áhrif á börn en ósamkomulagið magnast oft enn meira við skilnaðinn.
7. Börn sem upplifðu skilnað eru líklegri til að velja maka sína af kostgæfni.
   Enn segja tölurnar okkur annað. Skilnaðartíðnin er hærri hjá fólki, hvers foreldrar skildu.
8. Vegna þess hve dýrmætt það er fyrir börn að alast upp í fjölskyldu þá er betra fyrir þau að eiga stjúpforeldri, en að alast upp hjá einstæðu foreldri.
   Stjúpfjölskyldumynstrinu fylgja að meðaltali betri efnahagsleg lífskjör. En því fylgja jafnframt önnur samskiptaleg vandamál sem magna hættuna á upplausn.
9. Erfiðir kaflar í hjónabandi eru fyrirboði skilnaðar.
   Það geta alltaf komið upp erfiðir kaflar. Samkvæmt bandarískri rannsókn lýsti mikill meirihluti fólks, sem upplifði erfiða kafla á einhverjum tímapunkti en skildi ekki, hjónabandi sínu 5 árum síðar þannig að þau væru hamingjusöm eða mjög hamingjusöm.
10. Karlar eru líklegri til að halda framhjá og hafa frumkvæði að skilnaði.
    Merkilegt nokk, þá er hvorugt rétt.

Hverjir standa á bak við stjórnina?

Nú þegar útlit er fyrir að Sjálfstæðisflokkur og Samfylking myndi saman ríkisstjórn er ekki úr vegi að skoða aðeins hverjir standi á bak við hina væntanlegu stjórn.

• Rúmlega 115 þúsund kjósendur (52%) kusu annanhvorn flokkinn
• Tæplega 70 þúsund (31%) greiddu einhverjum hinna flokkanna atkvæði sitt
  
• Rúmlega 36 þúsund (16%) nýttu sér ekki kosningarétt sinn

Ef litið er til greiddra atkvæða fengu flokkarnir tveir 62%. Þau atkvæði tryggðu þeim 68% þingsæta. Það er því ljóst að ríkisstjórn þessara tveggja flokka hefur mjög sterkan þingmeirihluta. Vandi nýrrar stjórnar liggur hinsvegar í því að meirihluti kjósenda í tveim kjördæmum greiddi öðrum flokkum atkvæði sitt.

Stuðningur við Sjálfstæðisflokk og Samfylkingu, greindur eftir kjördæmum

Kjördæmi	D+S	Af greiddum atkvæðum	Af kjörskrá
Suðvestur	32.163	70%	59%
Reykjavík suður	24.074	67%	55%
Reykjavík norður	23.008	65%	53%
Suður	15.903	62%	52%
Norðvestur	8.992	49%	43%
Norðaustur	12.282	48%	41%
Alls	115.502	62%	52%

Það er ljóst að það verður ákveðin landfræðileg slagsíða á hinni nýju stjórn sem kemur óhjákvæmilega til með að setja þrýsting á málaflokka sem höfðu meira vægi í síðustu stjórn. Hvort að það sé jákvætt eða neikvætt er eflaust hægt að deila um, en það er ágætt að hafa þessar tölfræðilegu staðreyndir í huga næstu daga þegar við fylgjumst með stjórnarmynduninni.

Manstu eftir Titanic?

Utopia Group er kvikmyndahúsakeðja með starfsemi í Benelux löndunum. Hreint ansi skemmtileg auglýsing frá þeim.

Til varnar Framsóknarflokknum

Ímyndum okkur að Sjálfstæðisflokkurinn hefði náð 26 mönnum inn í stað 25. Léki þá nokkur vafi á því hvort að núverandi stjórn héldi áfram? Framsóknarflokkurinn hefur 7 þingmenn, sem eru litlu færri en Vinstrihreyfingin hefur, sjálfskipaður sigurvegari kosninganna. Kosningar eru tæki til að mynda starfhæfan meirihluta. Það, hvaða fylgi flokkar höfðu í öðrum kosningum, er aukaatriði. Vandi Framsóknarflokksins er ekki fylgið, heldur það hversu fáa raunhæfa kosti hann hefur til stjórnarmyndunar. Það yrði ekkert traust milli flokka í vinstristjórn. Jafnframt vantar núverandi stjórn einn mann upp á til að hún sé fýsilegur kostur. Sjálfur kysi ég helst stjórn Sjálfstæðisflokks og Samfylkingar, en það er annað mál. Framsóknarflokkurinn á fullt erindi í íslensk stjórnmál, enda standa á bak við hann tæp 12% kjósenda.

Svona á að sækja um starf

Þessi á skilið Thule. En hann mun ekki geta drukkið hann í vinnunni. Úr almennri umsókn um starf hjá ónefndri lágvöruverslun á höfuðborgarsvæðinu.

Starf sem sótt er um: Ég væri vel sáttur við stöðu forstjóra eða verslunarstjóra. Reyndar bara hvað sem er. Ef ég gæti valið úr störfum þá væri ég varla að sækja um hérna eða hvað?
Sækistu eftir fullu starfi? Svo lengi sem ég fæ greitt fyrir fullt starf, þá er mér sama þótt það sé hlutastarf.
Reykir þú? Meðan ég vinn, nei. Í reykingapásum, já.
Hefur þú hreint sakarvottorð? Þeir hafa aldrei náð mér.
Áttu auðvelt með að vinna sjálfstætt? Mér finnst best þegar enginn fylgist með mér.
Hvernig er heilsufar þitt? Fínt, takk fyrir að spyrja.
Áttu auðvelt með samskipti? Ef það væri ekki fyrir öll fíflin, þá gengju þau vel.
Áttu auðvelt með að vinna undir álagi? Það fer eftir því hver liggur á mér.
Menntun: Já takk, hefði ekkert á móti henni. Fylgir hún með?
Síðasta starf: Enn verra.
Heildarlaun í síðasta starfi: Minni en ég átti skilið.
Helstu afrek í starfi: Er búinn að koma mér upp frábæru safni af stolnum pennum og merkimiðum.
Ástæða þess að þú hættir í síðasta starfi: Hafði ekki lengur neitt til að skrifa með - eða á.
Launaóskir: 2 milljónir á mánuði væru fínar. Starfslokasamningur vel þeginn. Ef það gengur ekki gerið mér þá tilboð og við komumst að samkomulagi.
Tungumálakunnátta: Þegar ég hef fengið mér í glas þá bæði skil ég og tala flest tungumál.
Tölvukunnátta: Ég nota netið og er mjög lunkinn í að leggja kapal.
Meðmælendur: Fyrri vinnuveitendur væru eflaust tilbúnir til að mæla með mér, ef það væri tryggt að ég kæmi ekki til þeirra aftur.
Hvar sérðu sjálfan þig eftir 5 ár? Á Bahamas, umvafinn kvenfólki. Reyndar sé ég mig þar fyrir mér núna.

Verið velkomin á veitingarhús Microsoft

Hér er endurbætt útgáfa af skemmtilegri pælingu. Hvað ef veitingarhús væru rekin eins og notendaþjónusta?

Viðskiptavinur: Þjónn!
Þjónn: Góðan daginn, ég heiti Bill og er hér til að aðstoða þig. Er eitthvað sem ég get hjálpað þér með?
Viðskiptavinur: Já, það er fluga í súpunni!
Þjónn: Ok, kíktu aftur. Kannski er flugan ekki þá.
Viðskiptavinur: Jú, flugan er þarna ennþá!
Þjónn: Kannski er vandamálið, hvernig þú borðar súpuna; gætirðu prófað að borða hana með gaffli?
Viðskiptavinur: Þótt ég noti gaffal þá er flugan enn í súpunni!
Þjónn: Súpan gæti verið ósamhæfð við skálina. Hvernig skál ertu með?
Viðskiptavinur: Ég er með súpuskál!!!
Þjónn: Hmmmm... þá ætti það að virka. Kannski er þetta uppsetningarvandamál, hvernig var skálin sett upp?
Viðskiptavinur: Þú komst með hana á bakka! Hvað hefur það að gera með fluguna?
Þjónn: Manstu allt sem þú gerðir áður en þú varðst var við fluguna?
Viðskiptavinur: Já, ég gekk inn, settist við þetta borð og pantaði súpu dagsins!
Þjónn: Einmitt - hefurðu hugleitt að uppfæra yfir í nýjustu súpu dagsins?
Viðskiptavinur: Nýjustu... hva... eruð þið með margar súpur dagsins?
Þjónn: Já, elskan mín góða... þær breytast á klukkutíma fresti.
Viðskiptavinur: Nú - og hvernig súpa er súpa dagsins núna?
Þjónn: Það er tómatsúpa.
Viðskiptavinur: Fínt! Láttu mig fá tómatsúpu þá og reikninginn... ég er að verða of
seinn.

Þjónninn fer og kemur aftur með súpuskál og reikning.

Þjónn: Gjörðu svo vel - hér er súpa dagsins og reikningurinn.
Viðskiptavinur: En... þetta er... blómkálssúpa?
Þjónn: Já, tómatsúpan var ekki tilbúin.
Viðskiptavinur: Jæja þá... ég er orðinn glorsoltinn. Ég held að ég geti borðað hvað
sem er .

Þjónninn fer.

Viðskiptavinur: Þjóóóónn!!! Það er geitungur í súpunni minni!!!

Reikningurinn

Súpa dagsins: kr. 790
Uppfærsla á súpu dagsins kr. 390
Aðgangur að þjónustu og aðstoð kr. 2.990

Athugið, flugur í súpu eru viðskiptavinum að kostnaðarlausu. Súpa morgundagsins verður flugnalaus.

Pólitískar játningar

Komment á kjörstað í morgun

Mér þykir vænt um alla flokka. Ég lít svo á að þeir hafi allir eitthvað fram að færa. Enginn flokkur er nógu stór til að stjórna landinu einn og sér. Það neyðir flokkana til að eiga með sér samstarf. Þegar þangað er komið er gagnlegt að trúa því ekki að allt besta fólk landsins sé samankomið í einum flokki og að í hinum séu eintóm úrhrök.

Það er útlit fyrir tvísýnum kosningum. Með því er átt við að það er óljóst hvort að stjórnarmeirihlutinn haldi. Satt best að segja er mér alveg sama hvort hann geri það eða ekki. Ef hann heldur, þá vona ég bara að munurinn verði það lítill að menn treysti sér ekki til að halda áfram með óbreytta stjórn!

Það er eðli stjórnarsamstarfs að samkomulag myndast um að ákveðnir málaflokkar njóti friðhelgi. Í valdatíð núverandi stjórnar hafa hinar heilögu kýr verið landbúnaðarkerfið og Evrópumálin. Þar er kominn tími á breytingar. Til að keyra þær í gegn þarf hinsvegar sterka stjórn. Það er mitt persónulega mat að stjórn Sjálfstæðisflokks og Samfylkingar væru líklegust til þess að stýra þeim í höfn. Það leynist nefnilega kratahjarta undir heiðbláu yfirborðinu á Komment.